التخطي إلى المحتوى
طرق الربح من موقع خمسات كل ما يخص موقع خمسات

موقع خمسات طرق الربح من موقع خمسات كل ما يخص موقع خمسات
محتويات الموضوع:
1. ما هي فرص الشغل اون لاين عموما؟
2. ما هي خمسات تحديدا وممكن اشتغل فيها ايه؟
3. كيفية الاشتراك في موقع خمسات؟
4. ابدأ اتعلم واشتغل فيها ازاي؟
5. أهم الاسئلة الى هتخطرلك وكام ملاحظة.

خمسات هو السوق العربي لبيع وشراء الخدمات المصغرة

1. ايه هي فرص الشغل اون لاين عموما؟
حقيقي أنا كنت اعرف بحكم خبرتي شوية حجات .. بس لما دورت عشان أجاوب بشكل وافي على الجزئية دى لقيت حجات كتير جدا 😀 ممكن تستفيد منها لو عايز تعرف بشكل عام, بس لو مش عايز تتوه وجاي تعرف خمسات أو الfreelancing تجاوز النقطة دى تماما. وعموما أبرز المجالات الى لقتها واعرفها مع ذكرة نبذة عن كل واحدة فيها:
1- الاعلانات: وأبرزها إعلانات أدسنس ويوتيوب بارتنر, وهي ببساطة بتتلخص في الإعلان الى بتشوفه قبل فيديو اليوتيوب أو الإعلانات الى فى المواقع, حيث لو عندك قناة عليها متابعين أو موقع عليه زوار هتتعاقد مع أدسنس يحط إعلانه عندك وهتاخد فلوس على الزوار أو المشاهدات للإعلان.
2- الريفلر والإيفيلت: روابط الإحالة, ودى مواقع بتتعمد الوساطة زي ادسنس ما عدا أنها مش بتحاسب ع الإعلان, هي بتحاسب ع التسجيل أو شرا منتج عبر التسويق الإلكتروني, مثلا عارض منتج ع النت, وادتلك لينك خاص بيك وقلتلك كل واحد هيخش م اللينك دا يشتري المنتج بتاعي هديك عمولة كذا, وبيستخدمها الى عندهم صفحات كبيرة أو مواقع مشهورة ومربحة جدا.
3- ملأ الاستبيانات المدفوعة: ودى حاجة لقتها أثناء بحثي, متعرضلتاهش قبل كدا بس واضح أنها مربحة جدا, وفكرتها أن باحث مثلا عايز عينة من الناس يسألهم على حاجة أو يملوا استبيان مقابل أنه يدفعلهم الفلوس, ف انت مهمتك بتملى الاستبيان وتجاوب عليه بشكل واضح وتاخد المقابل.
4- الفريلانسنج freelancing: المستقل أو العامل الحر, ودى الى هنكلم عليها, وفكرتها ببساطة تقديم خدمة أو عمل ما بمقابل مادي متفق عليه عبر الانترنت. مثلا: تصميم بانر إعلانى في مقابل 5$. عمل بحث أو كتابة مقال ما مقابل 5$ والخ. ومواقع الـfreelancing على المتسوى العالمى والعربي كتيرة, بس أبرز موقع عربي ليه هو خمسات.. حيثُ أن حركة العملا والنشاط فيه أكبر بكتير من أي موقع عربي تاني. ولذا بنصح بيه بشكل عام.
.
– ملاحظة: كل مجال من المجالات دي فيه بحر مواقع ممكن تشتغل عليها, لو عجبك مجال معين ممكن تبحث فيه وتعرف عنه أكتر.
.
.
2. ايه هي خمسات تحديدا وممكن اشتغل فيها ايه؟
خمسات هي موقع تقديم خدمات مصغرة, بمعنى أنها ملتقي للعملاء والبائعين في كل ما يمكن تقديمه عبر الانترنت, على سبيل المثال : عميل سعودي قرر يعمل موقع إخباري, بغض النظر عن وقته أو قدراته أكيد مش هيعمل كل حاجة بنفسه! فهو يحتاج لمبرمج لمساعدته فى إنشاء وتطوير الموقع, ولمصمم لتصميم شعار الموقع وبعض التصميمات اللازمة للأخبار, وكاتب لكتابة بعض المقالات أو صحفي لإعادة صياغة بعض الأخبار من الجرائد السعودية.
ساعتها بيتوجه لخمسات .. بيدور عن أحسن الناس الى ممكن يقدموله الحجات دي, “فيأجّر” مبرمج لعمل الموقع بمقابل 20$ مثلا, ومصمم لتصميم الصور اللازمة بمبلغ 5$ لكل تصميم مثلا, وكاتب لكتابة كل ثلاثة أخبار أو مواضيع مقابل 5$ مثلا, وتعتبر 5$ هي أقل سعر للخدمة والمبلغ بعد كدا تضاعفي .. 5$ بعدين 10$ 15$ .. خمسات باينة اهِه 😀
بس وتعتبر خمسات هي الملتقى العربي الأول لتقديم الخدمات. وأهمية المواقع دى فى تسيير النوع دا من الأعمال أنها بتحفظ حق العميل في الحصول على طلبه بالجودة المتفق عليها, وبتحفظ حق المستقل أو البائع في الحصول على مستحقاته بعد قيامه بالطلب, حيث يقوم الموقع بدور الوسيط مقابل 20% من أرباح المستقل ( عن كل 5$ العميل بيدفعها بيوصلك 4$ ).
– ممكن اشتغل ايه في خمسات؟
كل المجالات الى ممكن تقدم خدمة فيها وتشتغلها هتلاقيها منسدلة تحت أيقونة “تصفح الأقسام” أعلى يمين الموقع, وبالتلخيص أهم الحجات الى بتطلب في الموقع وممكن تشتغل فيها هناك:
التصميم بأنواعه وتفرعاته, البرمجة بأنواعها وتفرعاتها, الكتابة الحصرية, الترجمة, التدقيق اللغوي, تقديم الأبحاث, التسويق على مواقع السوشيال ميديا ويوتيوب, التسويق على المواقع عامة, خدمات التسجيل الصوتية, خدمات المونتاج وصنع فيديوهات الانفوجرافيك, والخ.
.
* للعلم الموقع عربي وبسيط وسهل الاستخدام, والشرح تفصيلا فى الجزء النظري عشان تبقي داخل فاهم كل حاجة بالبلدي, والشرح فى الجزء العملي عشان تعرف تبيع وتعمل فلوس فيه بسرعة وهو الجانب المهم *
.
.
3. أسجل في خمسات ازاي؟
الموقع عربي والتسجيل فيه سهل جدا, وشرحه سيكون مثل شرح تسطيب برنامج .. اضغط next! ومع ذلك من المهم ملاحظة أن موقع خمسات هو تابع للشركة الأم “حسوب”, والشركة حسوب عندها كذا موقع ( أغلبها مهم للغاية على المتسوي العلمى والعملي يمكنك مراجعتها لاحقا ) وبعد تسجيلك في موقع حسوب سيفتح لك حسابا تلقائيا في جميع مواقع الشركة ومنهم خمسات, لتدخل من حسوب إلى خمسات بشكل عادي.
للتسجيل في موقع خمسات : https://khamsat.com/
وعبر أيقونة “مستخدم جديد” أعلى يسار الصفحة وتابع الخطوات. ممكن تسجل وتيجي تكمل قراية أفضل لأن الكلام الجي عملي.
– ملاحظة هامشية : بعد تسجيلك في حسوب باسمك سواء بالعربي أو بالانجليزي, وعند دخولك لموقع خمسات تحديدا.. هيطلب منك اسم للمستخدم في خمسات, يكون مميز ومش متاخد قبل كدا ( زي الميل ) ففكر في اسم مميز يكون غير مأخوذ ويُفضل استعمال اسمك الحقيقي, مثلا انا بستخدم : The writer Mohamed Saber.
.
.
4. ابدأ اتعلم واشتغل فيها ازاي؟
دلوقتى سجلت وفهمت الدنيا الحمدالله؟ تبدأ تشتغل ازاي بأة وتعمل ايه 😀
مبدئيا لازم تفهم الجزئية دى : خمسات هو موقع لعرض الخدمات, يعني ايه! يعني الاساس فيها انك بتضيف خدمة – التصميم مثلا – مع معرض لأعمالك وخبرتك فى المجال وتستني العميل السعودي ييجي يطلبك طب انا ضفت خدمتى خلاص هعد حاطط ايدي على خدى مستنى العميل 😀 ؟؟ لا طبعا, هنا هنوصل لأهم حتة فى البوست, قسم ” طلبات الخدمات الغير موجودة ” !
ف احنا دلوقتى بنكلم على طريقتين للتواصل مع العملا 1- إضافة الخدمة. 2- قسم الطلبات فى المجتمع أو منتدى الموقع.
وقبل م ادخل فى الحتت دية عشان دية الحتت المهمة والعملية في الموضوع, وبرغم إنك وصلت لهذه المرحلة المتقدمة من الحديث وعرفت فكرة الشغل فى الموقع, وكونك سجلت – غالبا إن شاء الله – في الموقع, هدعوك لقراءة أربع مقالات داخل الموقع عشان تختم الجزء النظري خالص .. تُبيّن كيفية عمل الموقع, وكيف يضمن الموقع حقك, وشروط الاستخدام, والاسئلة الشائعة الى هتقابلك في استخدام الموقع.. المقالات دية بتحكى الى انا قلته باستفاضة, ولو هتشتغل أو هتجرب تشتغل لازم تقراهم, وهنا هتاخد النص ساعة التانية :

.
==============================
دلوقتى انت فهمت الدنيا كلها نظريا, الجزء العملي ازاي تضيف خدمة بسهولة وازاي تشارك فى المجتمع بقوة عشان تجيب عملا وتعمل فلوس؟ قبل م تخش الجزء دا خدلك بريك اهضم الى فات 😀 يمكنك تناول نسكافيه ساخن أو قضاء بعض الوقت في تصفح الموقع للاعتياد على شكله.
=========================================
.
الجزء العملي كله فى الموقع عبارة عن ازاي تضيف خدمة, وازاي تشارك فى المجتمع وتجيب عملا, وازاي تتعامل كويس مع العملاء, والجزئيتين الأولانيين هنكلم عنهم والجزء التالت مش موضوعنا 😀 أو هتفهم فى الآخر ممكن تقرى عنه فين.
.
1- إضافة خدمة:
لازم تبقي ضايف اي خدمة في بروفايلك عشان العميل يقدر يراسلك عليها او يطلبها منك، الخدمة عبارة عن عنوان وصورة ووصف عادي، عشان تضمن ان خدمتك الموقع هيقبلها لازم يبقي فيها 1- صورة عالية الجودة مرتبطة بموضوع الخدمة. 2- وصف محدد للي هتقدمه، زي هتقدم ايه وبكام وفي قد ايه، مثلا : تصميم لوجو في يومين مقابل 5$ او كتابة مقال 1500 كلمة مقابل 5$، ويفضل طبعا تحط نماذج اعمال سابقة لو ليك.
– نصيحة قبل م تحط اي خدمة في اي مجال : شوف الخدمات المشابهه والمنافسة ليك، عشان تعرف تحط وصف ممتاز للخدمة وعرض منافس.
– ملاحظة : ممكن تعدل في الخدمة بعد كدا او تحذفها عادي.
.
2- وضع عرض في المجتمع:
ودي أهم نقطة في المقال كله، ودي الي هتستفيد منها حتي لو شغال في خمسات من قبل كدا، ودا سر تحقيقي ل100$ في 20 يوم مش شهر 😀قسم الطلبات الغير موجودة في مجتمع خمسات ( اسفل يسار الشاشة )،
مجتمع خمسات عامل زي منتدي الموقع كدا، فيه اقسام زي تجارب المستخدمين وامور عامة حول خمسات والخ، بس اهم قسم الطلبات الغير موجودة دا، ودا الي بيحط فيه العملاء طلباتهم ويستقبلوا العروض من المستقلين الي هو احنا،
المقال دوت فيه خلاصة خبرتي سنتين في المجتمع وجذب العملاء، وبيعلمك ازاي تحط عرض كويس وجذاب بشكل احترافي، لو اول مرة تسمع عن خمسات ممكن متفهمش نقاط كتير في المقالة، بس بغد م تاخد علي جو المجتمع في نص ساعة كدا هتفهم كل بند فيها.. ولو طبقتهم هتعرف تبيع خمس خدمات أسبوعيا وتكبر بسرعة ان شاء الله. وفاضل في الجزء العملي في الموقع ازاي تتعامل مع العميل بشكل كويس عشان يقيمك ايجابي، بعد م تسجل في الموقع حط اي تعليق في الموضوع دا *** وان شاء الله لما انزل المقال التاني في الموقع هيوصلك اشعار او تنبيه.
.
– كدا انت عرفت كل اللازم عمليا ونظريا عن خمسات.. انطلق ^^
.
.
5. أهم الاسئلة الى هتخطرلك وكام ملاحظة:
.
1- ممكن اعمل 100$ اول شهر؟
عايز الصراحة؟ لا 😀 ممكن بس صعب عشان اول فترة لازم تاخد وقت عما تتعود وتفهم جو الموقع، بمعني مع الوقت بتكسب خبرة طبيعي.. ولو ركزت في ازاي تكتب عرض كويس هتوفر علي نفسك كتير،
وعموما، لو بتعرف تعمل حاجة كويس.. والتزمت في عروضك بالبنود الي كتبتها في ازاي تعمل تعليق كويس في المجتمع هتعمل اكتر من 100$.
.
2- ايه متوسط الخدمات الي ممكن ابيعها اسبوعيا وابقي ماشي كويس؟
من وجهة نظري، المتوسط هو 3 خدمات أسبوعيا خلال اول شهر، يعني لو بعت 3 خدمات اول اسبوع ف انت ماشي كويس، ولو بعت اكتر من كدا ف انت ماشي بشكل متسارع او معدل ممتاز، ولو بعت اقل ف انت ماشي ببطأ، يا إما عشان مش مدي الموضوع وقته او مش مظبط وصف خدمتك او مش بتشارك في المجتمع.
.
3- لو عايز اشتغل بس مبعرفش اعمل اي حاجة من دول اعمل ايه؟
اتعلم، اي شغلانة محترمة او شركة دلوقتي عايزة تدريب 3 شهور، خد شهر واحد اتعلم حاجة تشتغل فيها، وكل الي ممكن تشتغله اون لاين ممكن تتعلمه اون لاين.
.
4- اتعلم او اشتغل في ايه؟ ايه اكتر مجال مطلوب؟
بشكل عام فيه توازن في السوق، يعني زي م فيه طلبات تصميم وكتابة كتير فيه كتاب ومصمين كتير، ف انت متبصش ع السوق، بص ممكن تحب تشتغل في ايه وشايف انك ممكن تتميز فيه.
.
5- ايه اكتر حاجة سهلة بتكسب من وجهة نظرك؟
التسويق، المسوق مش بيكتب ولا يصمم ولا يبرمج، غالبا بتبقي خطوات سهلة ومحددة وبيجيله شغل وفلوس كتير، التسويق بيعتمد علي المعرفة مش الجهد.
.

من المستفيد من موقع خمسات :

بالطبع المستفيد الاول من هذه الفكرة هوه مؤسسي الموقع :  لان فكرة الموقع قائمة على بيع الخدمات ويقوم الموقع باقتطاع دولار واحد على كل خمسة دولارت

المستفيد الثاني  هو بائع الخدمة : لانه اذا قدم خدمة وبدات تحظى باهتمام زوار الموقع فسيبدأ بتقدم الخدمة والبدأ في جني الارباح وهكذا يبدا في تقديم خدمات جديدة والاستمرار في جني الارباح

المستفيد الثالث وهو مشتري الخدمة : لان هذا الموقع جعل الطريق بسيط وممهد للشركات والمواقع الناشئة في الحصول على خدمات متعددة بارخص الاسعار
6- بسحب الفلوس ازاي؟
الموضوع دا رخم ومعقد عشان طريقة السحب عبر باي بال ودا بنك عالمي مش شغال في مصر، والموضوع دا ليه 3 حلول هقلهم من الاسوأ للافضل بشكل تصاعدي :
1- وكيل خمسات : وكيل معتمد من خمسات هتحط ايميله في باي بال ويحولك الفلوس رصيد أو فودافون كاش او بريد او اي خدمة كاش، ودا منصحش بيه اطلاقا لأن عمولته كبيرة جدا! وشخصيا متخانق معاه 😀 عموما لما كان الدولار ب18 كان بيسحبه بعشرة -_-
2- تشتري خدمات رصيد : فيه في خمسات خدمة تحويل رصيد او فودافون كاش او فلوس او اورانج والخ، ودي حلوة شوية..
3- الارسال لباي بال : تبعت رصيدك لحد عنده باي بال شغال يكون سعره احسن من الوكيل، ودول ممكن تلاقيهم كتير بس لازم يكونوا ثقة عشان انت هتحوله كل رصيدك ومفيش ضامن من خمسات طبعا انت بتحوله الرصيد علي مسؤليتك الشخصية.
.
7- نسيت اقلك
يفضل تسجل باسمك الحقيقي وتحط صورتك الشخصية، دا بيدي ثقة للعميل انه بيتعامل مع شخص حقيقي مش واحد جاي يلعب. كمان قبض فلوس الخدمة بيتاخد بعد 14 يوم، يعني سلمت شغل النهاردة فلوسه هتتحط في حسابك وتقدر تسحبها بعد اسبوعين، حفاظا لحق العميل لو فيه اي حاجة غلط في الشغل، والحد الادني لسحب الأرباح 10$.
.
8- تنصحني بايه؟
طور من نفسك واتعلم اكتر م بتشتغل، الفلوس مبتجيش بالمجهود علي فكرة! فيه ناس بتتفشخ حرفيا عشان فلوس قليلة وناس بتعمل فلوس كتيرة بسهولة، والفرق بينهم كل واحد يعرف ايه التاني ميعرفوش. ( يمكن 70$ من ال100$ الي عملتها بسبب اني اعرف ووردبريس كويس )
.
9- لا تيأس
متقدمش علي حاجة مبتعرفش بتتعمل ازاي عشان فيه كتير غيرك قدم عليها! مثلا : فيه خدمات زي الف لايك في يوم او النشر يدويا في 200 منتدى، الف لايك في يوم مش عشان ناس كتير بتقدمها ف انت هتعمل شير لاصحابك وانفيت للصفحة وهتجيب الف لايك!؟ والنشر في 200 منتدي عمره م هيكون يدويا بس اهو كلام، المعرفة اهم من المجهود. متتقدمش لحاجة متعرفعاش.
.
10- خمسات للشغل وتقديم الخدمات مش “للربح السهل والسريع من الانترنت” !!
يعني شغل ومجهود مش هتخش تسجل تعمل 100$ 😀
.
11- ابوس ايدك متسوأش سمعتنا 😀
صدق او لا تصدق، ناس كتير في خمسات مبيعرفوش يعملوا حاجة! داخلين عشان سمعوا ان فيه ناس بتعمل فلوس في الموقع وخلاص، وبيتعبوا نفسهم ويتعبونا معاهم، متتقدمش لحاجة غير لو انت كويس فيها، مثلا : متقدمش خدمة كتابة مقالات وانت مش عارف الفرق بين الهاء والتاء المربوطة ( بشوفها كتير وربنا )، او متقدمش خدمة تصميم وانت مش عارف الفرق بين الفوتوشوب ورتريكا 😀
.making-money-with-khamsat
12- ثابر وتعلم
لو ناوي، ثابر وتعلم وتطور، ثابر وتعلم وتطور، ثابر وتعلم وتطور.
.
13- شير للبوست عشان غيرك يستفيد 😀
اغلب الي دخلوا خمسات قبل كدا وبيعملوا دلوقتي عشرات ومئات الدولارات شهريا عرفوه من خلال بوست او مقالة، لو شايف البوست مفيد شيّره لغيرك ممكن تكون سبب ان واحد يلاقي شغل كويس 🙂
.
14- اي سؤال اتفضل في كومنت ^^
ولو واجهتك مشكلة مستقبلا ممكن تكلم الإدارة زي مهو موجود في الصورة او تكلمني

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *